David Babayan

Ճիշտ Մոտիվացիա Սոցիալական Ցանցերի Մարկետինգում

Վերջին ժամանակներում շատերն են հետաքրքրված մարկետինգով։ Ըստ որոշ հարցոմների` մարդիկ մտածում են, որ մարկետինգը երկրորդ ամենաբարձր վճարվող մասնագիտութունն է։ Ու սա իսկապես ճիշտ է, քանզի առանց լավ մարկետինգային պանի, ստրատեգիայի ու իրագործման ոչ մի արտադրանք չի հասնի վերջնական հաճախորդին։ Սակայն հաճախ մարդիկ, ովքեր հետաքրքրված են մարկետինգով, սխալ կերպ են փորձում մարկետոլոգ դառնալ։ Ուստի եկեք քննարկենք մի քանի սխալ և ճիշտ մոտիվացիաներ։ Մենք չենք ուսումնասիրելու որևէ գործիք կամ տեխնիկա։ Փոխարենը կատարելու ենք վերլուծություններ և տեսնելու ենք ինչպես է նույն բանը, տարբեր մոտիվացիաներով անելը, տարբեր արդյունքների բերում։ Այս վերլուծությունը կօգնի լինել արդյունավետ և պահանջված։


Պնդում 1․ Սոցիալական մեդիայի մարքետոլոգ լինելու համար պետք է ուսումնասիրել սոցցանցերի գործիքները

Հայաստանում սոցիալական մեդիայի մասնագետը և սոցիալական մեդիայի մարկետոլոգը գրեթե միշտ նույնականացվում է։ Իրականում սրանք երկու տարբեր մասնագիտություններ են։ Արդյո՞ք սոցիալական մեդիայի մարկետոլոգը պետք է սոցիալական մեդիայի մասնագետ լինի։ Կարծում եմ, այո՛։ Սակայն սոցիալական մեդիայի մասնագետ լինելը դեռ չի նշանակում ,որ դուք սոցիալական մեդիայի մարկետոլոգ եք։ Մարկետինգը ուսումնասիրում է մարդկանց վախերն ու հաճույքները, ապա հստակեցնում՝ ինչպես է գովազդվող պրոդուկտը հաճախորդին հաճույք պատճառում կամ վախերի դեմ պայքարում։ Այս նպատակին հասնելու բազմաթիվ միջոցներ կան։ Սոցիալական մեդիայի մարկետոլոգի խնդիրն է տեսնել՝ ինչպես է սոցիալական մեդիան օգտագործվելու, հաճախորդներին վերը նշված գաղափարները ներկայացնելու։ Այս նպատակին հասնելու համար գրեթե երբեք մեկ գրառումը բավարար չէ, մեկ հրապարակումը քիչ է։ Անհրաժեշտ է ստրատեգիա, բազմաքայլ կոմբինացիա։ Մարդը, ով սկսել է իր կրթական ճանապարհը սոցիալական մեդիայի գործիքների ուսումնասիրությունից, հաճախ ավելի կենտրոնացած է լինում տեխնիկական լուծումների վրա և ոչ թե ստրատեգիայի կամ բազմաքայլ խաղի վրա։ Արդյունքն են կոնտեքստից կտրված, ընկերության փիլիսոփայության հետ կապ չունեցող գովազդները։ Ուրեմն, եթե ցանկանում ենք դառնալ սոցիալական մեդիայի էքսպերտ, իհարկե, ուսումնասիրում ենք սոցիալական մեդիայի աշխատանքի սկզբունքները։ Սակայն եթե ցանկանում ենք դառնալ սոցիալական մեդիայի մարկետոլոգ, նախ ուսումնասիրում ենք՝ինչ է մարկետինգը, ինչպես է մարդը ընտրություն կատարում, ինչպես է կազմվում մարկետինգային ստրատեգիա, ապա անպայման ուսումնասիրում, թե որ սոցիալական մեդիան որ նպատակների համար է արդյունավետ, ուսումնասիրում յուրաքանչյուր մեդիա ռեսուրսի առաջարկած գործիքները։


Պնդում 2․ Թվային մարկետինգը ժամանակակից մարկետինգն է

Ոչ և կրկին՝ ոչ։ Եկեք տարբերակենք՝ ինչ է մարկետինգը և ինչ է մարկետինգային գործիքը։ Մարկեթինգը գործիք է բիզնեսի համար՝ պատմելու մարդկանց՝ ինչպես գովազդվող պրոդուկտը կարող է լուծել որևէ խնդիր կամ պահանջ, որը հաճախորդը ունի։ Մարկետինգի այսպես կոչված ճյուղերը տարբեր գործիքներ են՝ այս ինֆորմացիան փոխանցելու համար։ Թվային մարկետինգը, սոցիալական մեդիայում մարկեթինգը, հեռուստատեսային մարկետինգը, երես առ երես մարկետինգը, պաստառների մարկետինգը, մարչենդայզինգը և մյուս բոլորը պարզապես գործիքներ են՝ նպատակին հասնելու համար, որոնք կարող են կիրառվել ինչպես միասին, այնպես էլ առանձին-առանձին։ Փաստը, որ մենք ապրում ենք ինտերնետի դարում և որ պարդուկտների մեծամասնության համար ինտերնետ մարկետինգը գին-արդյունք համադրության մեջ լավագույնն է, մերժել հնարավոր չէ։ Սակայն ասել, որ ժամանակակից մարկետինգը հենց թվայինն է, նույնպես ճիշտ չէ։ Թվայինը, թեկուզ և լավագույն, բայց միևնույնն է, գործիք է։


Պնդում 3․ Պետք է օգտագործել այն թեմաները, որոնք թրենդային են

Թրենդային թեմաները մեծ լսարան հավաքելու արագ միջոց են։ Մեծ է գայթակղությունը օգտագործել վերջին քաղաքական սկանդալը, վիռալ հումորային հոլովակը, հայտնի մարդու խոսքում սխալը, սկանդալային դեպքը և այլն, սակայն մինչ կտրվեք գայթակղությանը, մի պահ կա′նգ առեք։ Մտածե′ք՝ արդյոք տվյալ նյութը որևէ կապ ունի գովազդվող պրոդուկտի հետ։ Թրենդային թեմաներին կարելի է անդրադառնալ միայն այն դեպքում, եթե դրանք ընկերության փիլիսոփայության և մարկետինգային ռազմավարության հետ ուղիղ կապ ունեն։ Հիշե՛ք՝ թրենդերը փոփոխվում են օրական մի քանի անգամ, ուստի եթե պարզապես թրենդային նյութ հրապարակեք, այն երկար թրենդային չի լինի։ Հայաստանի մասշտաբներում նման նյութը կարող է ակտուալ լինել մինչև մի քանի ամիս, ոչ ավելի։ Արդյո՞ք դուք ցանկանում եք արագ աճել, հետո նույնքան արագ կորցնել լսարանը։ Եթե ցանկանում եք ունենալ կայուն լսարան, ով ձեզ կհետևի անկախ թրենդերից, ապա հետևեք ձեր ռազմավարության, ձեր փիլիսոփայությանը և երբ համապատասխան թրենդային նյութ լինի, որը կառընչվի ձեր փիլիսոփայությանը, հրապարակեք այն ու կտեսնեք՝ ինչպես են ձեր արդեն հավատարիմ դարձած հետևորդները տարածում տվյալ նյութը և ձեզ նոր հետևորդ-հաճախորդներ բերում։


Պնդում 4․ Լավ մարկետինգը արդյունքները արագ է ցույց տալիս

Իսկ ի՞նչ է լավ մարկետինգը։ Իմ պատասխանն է՝ լավ մարկետինգային ռազմավարությանը համապատասխանող մարկետինգային պլանների հաջորդականություն։ Հետևաբար, արդյունքը պետք է երևա լավ մարկետինգային պլանից։ Սակայն հարց է առաջանում՝ որքա՞ն արագ պետք է արդյունքները տեսանելի լինեն։ Չկա սահմանված ժամկետներ, որոնց պետք է հետևել ու իրականում կարիք էլ չկա արհեստական ժամկետներ սահմանել՝ հաջողություն արձանագրելու համար։ Ցանկացած մարկետինգային պլան պետք է սահմանի ժամանակային ցիկլեր և շոշափելի արդյունքներ, որոնք պարտադիր չի՝ ուղիղ կապ ունենան վերջնական արդյունքի հետ։ Եվ եթե պլանը իրագործելիս ցիկլի վերջում տվյալ ցիկլի կանխատեսված արդյունքն է ստացվում, ուրեմն ամեն բան լավ է՝ շարունակեք աշխատել։ Միայն կհավելեմ, որ ցանկացած տեսակի հաջողություն նման է երկրաչափական պրոգրեսիա, ուստի ակնկալեք, որ սկզբում արդյունքը պետք է լինի ավելի քիչ ու դանդաղ աճող, քան պլանի ավարտին մոտենալիս։ Արդյունքները կարող են իսկապես մի քանի օր անց իրենց զգացնել տալ, սակայն սա երաշխիք չէ, որ տվյալ մարկետինգային պլանը լավն է կամ վատը։ Եթե կա երկարաժամկետ պլան և տվյալ պահի համար կանխատեսումը ճիշտ է, ուրեմն ամեն ինչ լավ է, կարելի է առաջ գնալ։

Պնդում 5․ Սոց ցանցերում հրապարակումները պետք է ուշադրություն գրավեն

Կրկին և՛ այո և՛ ոչ։ Սոցցանցերում ցանկացած հրապարակում պետք է պատասխանի երեք հիմնական հարցերի՝ ում համար, ինչու և ինչ ակնկալիքով։ Նախ հասկացեք՝ ում համար եք ցանկանում անել տվյալ հրապարակումը, ձեր աուդիտորիայի որ խմբի համար է նախատեսված տվյալ հրախարակումը։ Ապա հասկացեք՝ ինչու է այդ հրապարակումը պետք այդ խմբին։ Ինչ է անելու հետևորդը այդ ինֆորմացիայի հետ։ Ապա հասկացեք՝ ինչ արդյունք եք ակնկալում։ Ի դեպ, արդյունքը պարտադիր չէ որ լինի ուղիղ, օրինակ՝ նոր հետևորդներ, նոր լիդեր և այլն։ Արդյունքը կարող է լինել նախապատրաստական ընդհանուր արշավի տրամաբանության մեջ ակտիվության պահպանմամբ և այլն։ Այս երեք հարցերը ձեզ կօգնեն հեշտությամբ հասկանալ՝ պետք է արդյոք տվյալ հրապարակումը թե ոչ և ում համար է այն նախատեսված։


Այսպիսով՝

Այսպիսով, ինչ ունենք։ Ես ներկայացրեցի ընդհամենը 4 իրավիճակ ու պարզ դարձավ, որ կախված, թե ինչ է կատարվում ձեր գլխում, տվյալ պնդումը կարող է լինել ինչպես ճիշտ, այնպես էլ սխալ։ Շատ կարևոր է, թե ինչ մոտիվացիայով եք մոտենում հարցին։ Մի քանի կարևոր սկզբունքներ, որ ուզում եմ հիշեք.

Երբեք մի՛ արեք քայլեր՝ հենց հիմա արդյունք ստանալու համար։ Թող հիմա արդյունքը քիչ լինի, սակայն քայլերը լինեն միտված երկարաժամկետ ու խոշոր արդյունքի։ Միևնույն ժամանակ կարիք չկա խորշելու արագ արդյունքից, եթե իհարկե այդ արդյունքը ձեր պլանի մի մասն է։

Ցանկացած քայլ անելիս հասկացեք, թե տվյալ գործողությունը ինչու է պետք։ Հաճախ տվեք ինչու կամ ինչի համար հարցերը, ու ձեզ շատ բան պարզ կդառնա։

Ճշմարտությունը այն է, որ մասսաները կայուն չեն, հեշտ կառավարվող են և արագ են մոռանում այն ամենը, ինչ արել եք։ Ուստի երբեք մի փորձեք պլանից դուրս քայլերով հաճոյանալ այդ մասսաներին։

Viewed 427 Time